Буа районы башлыгы белән очрашудан соң гуманитар ярдәм составын үзгәртәчәкләр
Буа районы башлыгы Ранис Камартдинов ике атналык ялга кайткан мобилизацияләнүчеләр белән очрашу үткәрде. Очрашуда катнашкан 10 ир-егет гуманитар тәэмин итү белән бәйле вәзгыять турында сөйләде.
«Азык-төлек, кием-салым буенча - барысы да яхшы. Тепловизорлар буенча сорау күбрәк . Бу безнең реаль ихтыяҗ. Чөнки дошман төнлә күп гамәлләр кыла, ә тепловизорлар безгә "сукыр песиләр" булмаска ярдәм итә. Квадрокоптерлар һәрвакыт арттыру мөмкинлеге белән кирәк », - дип уртаклашты хәрби хезмәткәрләрнең берсе.
Бу көннәрдә районда гуманитар йөкнең чираттагы партиясен формалаштыралар. Исемлек, мобилизацияләнүчеләрнең теләкләреннән чыгып, эшләнде. Аны мобилизацияләнгән кешеләр белән очрашудан соң тагын төзәтәләр, дип билгеләп үтте Ранис Камартдинов.
«Тепловизорлар сатып алуга басым ясыйбыз. Егетләр маскхалатлар кирәклеген билгеләп үттеләр. Ә менә тушенка һәм тәм-томны вакытлыча "стоп" ка куябыз - якташлар боларның барысын да запас белән бар диләр. Вакытлыча буржуй-мич тә кирәкми. Ярдәм чараларын кирәкмәгәнгә "таратмас өчен", чыннан да кирәкле йөкне генә формалаштырырбыз», - дип сөйләде район башлыгы.
Шулай ук Буа үзәк район хастаханәсе базасында талпаннардан вакцинация оештырдылар. Хәйриячеләр көче белән районда бөҗәкләрдән саклану өчен репеллентлар сатып алачаклар.
«Әйе, район бюджетында бу пунктларга махсус чыгым статьясы юк. Әмма безнең иганәчеләр, предприятиеләр, эшмәкәрләр, битараф булмаган гражданнар, без барыбыз да “ярдәм армиясе” булып берләштек һәм кирәкле партияләрне туплый алабыз», - дип белдерде район башлыгы.