Буа районы башлыгы янгыннан зыян күргән гаиләгә килде, анда 14 кеше йортсыз калган
Буа районы башлыгы Ранис Камартдинов Ырынгы авылында Андреевлар гаиләсе белән очрашты. Бер төн эчендә коточкыч янгын 14 кешене йортсыз калдырган. Гаиләдә 14 яшькә кадәрге 7 бала үсә. Гадәттән тыш хәлнең сәбәбе – электр кыска ялганышы дип әйтәләр. Фаҗигане булдырмаска республика программасы буенча йортта урнаштырылган янгын сигнализациясе ярдәм итә: әни кеше аның тавышларыннан уяна, бу вакытка ут инде ишекләрне биләп алган була, күп балалы гаилә тәрәзә аша уттан котыла.
«Богдан, Мирон, Ирина тордылар. Аларның өчесен залдагы тәрәзә аша чыгардым. Аяк астында линолеум инде яна иде, »- дип искә ала Альбина Андреева.
Тиз арада янгын сүндерүчеләр дә килеп җитә, әмма ут зур гаиләнең бөтен мөлкәтен юк ите өлгерә. Кешеләр инде ярдәмгә кушылдылар, акча күчерәләр һәм әйберләр китерәләр. Район администрациясе дә торакны торгызуда ярдәм итәчәк.
«Өйне салкыннар җиткәнче, көзгә кадәр торгызу эшләрен тәмамлау мөһим. Яңа елга-яңа йорт - бу көннәрдә гаилә шундый девиз белән яши, һәм без шулай ук ярдәмгә кушылырбыз, кирәкле ярдәм күрсәтербез», - диде Буа районы башлыгы бәла күргән гаилә белән очрашуда.