Буа игенчеләренә басуларда агитбригадалар ярдәм итә
Күпьеллык традиция буенча Буа районында урып-җыю эшендә эшләүче аграрийларга басуларга район мәдәният идарәсе каршындагы агитбригадалар чыга. Мәсәлән, бу урак өсте вакытында, бер эссе көнне, төшке аш вакытында, Татар Буасы һәм Янтуган авыл клублары хезмәткәрләре аграрийлар алдында чыгыш ясадылар. Район башлыгы Ранис Камартдинов үзенең социаль челтәрләрендәге кадрлар белән уртаклашты.
«Аграрийлар мондый ял минутлары өчен һәрвакыт рәхмәтле! Ә без аларга урып-җыю хезмәте өчен рәхмәт белдерәбез:уңыш күрсәткечләре республиканыкыннан югарырак - гектарыннан 32 центнердан артык! Мәйданнарның 60% тан артыгында 93 мең тоннадан артык ашлык суктырылган», - дип билгеләп үтте Буа районы башлыгы.
Авыл хезмәтчәннәре артистларга яхшы кәеф һәм алга таба казанышларга илһам биргәннәре өчен рәхмәт белдерделәр. Эссегә карамастан, термометр шкаласы төшке аш вакытында 30-32 градус билгесендә туктагач, артистлар авыл хезмәтчәннәрен үз җырлары, шигырьләре һәм биюләре белән сөендерәләр.
«Шундый эсседә дә безгә артистлар килә, яраткан җырларыбызны башкаралар. Ял итеп алабыз», - диләр аграрийлар.
Районда иң яхшы комбайнчыларны, мең тонна суктыру билгесенә килгәннәрне хөрмәтләделәр. Хәзерге вакытта Буа районында урып-җыю эше экваторга якынлаша, көзге бодай һәм борчак суктыру төгәлләнгән, дип хәбәр итте районның авыл хуҗалыгы идарәсе башлыгы Ранис Габитов.