Татарстанның яшь эшмәкәрләренә үз эшләрен үстерү өчен грант алырга ярдәм итәчәкләр
2023 елның 10-20 августында Казанда «Кече һәм урта эшкуарлык һәм шәхси эшкуарлык инициативасына ярдәм» илкүләм проектын гамәлгә ашыру кысаларында ТР Икътисад министрлыгы һәм «Минем бизнес» үзәге ярдәме белән гамәлгә ашырыла торган «Яшьләргә бизнес» белем бирү программасының икенче агымы узачак.
«Яшьләргә бизнес» - «Минем бизнес» үзәгенең белем бирү проекты, аның нәтиҗәләре буенча Татарстанның яшь эшкуарлары 500 мең сумга кадәр грант ала ала. Программа 18-25 яшьлек яшьләргә юнәлдерелгән.
Программаның мөһим үзенчәлеге булып яшьләргә фундаменталь күнекмәләр генә түгел, ә һәр этапта үз эшенең проектын эшмәкәрлек өлкәсендә әйдәп баручы белгечләр белән эшләү һәм үз идеяләрен тормышка ашыру өчен ярдәм алу мөмкинлеге бирү тора.
Әлеге программада катнашу нәтиҗәсендә яшь эшмәкәрләр мөһим күнекмәләргә ия була алачак:
- Стандарт һәм типик булмаган эшкуарлык ситуацияләрен нәтиҗәле хәл итә белү;
- Үз бизнес-планын эшләү һәм аны экспертлар алдында уңышлы тәкъдим итү сәләте;
- Эшкуарлык эшчәнлегенә инновацион караш өлкәсендә күнекмәләр алу һ. б.
«Яшьләргә бизнес» белем бирү программасын узуның мөһим өстенлеге Татарстан Республикасы Икътисад министрлыгыннан үз эшен үстерү өчен 100 000 сумнан 500 000 сумга кадәр грантка гариза бирү мөмкинлеге булачак.
Татарстан Республикасында уздырылган «Яшьләргә бизнес» белем бирү проектының беренче этабы кысаларында катнашу өчен гаризалар саны 650 кешедән артып китте. Аларның 190ы өчен программаны үтү үз бизнесын үстерүдә старт ноктасы була. Әлеге инициативаның максаты яшь эшмәкәрләргә һөнәри үсешләрендә ярдәм итү һәм стимуллаштыру, шулай ук бизнесны уңышлы алып бару өчен кирәкле белем һәм күнекмәләр белән тәэмин итү.
Ярдәм программалары һәм бушлай белем бирү чаралары «кече һәм урта эшкуарлык» илкүләм проекты кысаларында «Минем бизнес» Татарстан үзәге базасында гамәлгә ашырыла.