Буа муниципаль районы

Бәйрәм табынына

2013 елның 24 декабре, сишәмбе

Киләсе елның хуҗасы Ат эш яратучан хайван. Ә кем күп эшли, күп ашый. Шуңа күрә дә быел бәйрәм өстәлегез сыйлардан сыгылып торсын. Моның өстенә ел сезнең өчен уңышлы да булсын дисәгез, түбәндәге киңәшләрне тотыгыз.
2014 елны каршылаучы бәйрәм табынында яшелчә, яңа тотылган балык, ит һәм кабак тәгаен булырга тиеш. Зәңгәр агач Атка ярарга теләсәгез, азыкларны бары тик натураль, искермәгән продуктлардан гына әзерләгез. Консервланган ризыклардан, ярымфабрикатлардан баш тартыгыз. Алар Ат өчен түгел. Яшелчә салатлары, кабымлыклар исә, алар күп итеп яшел тәмләткечләр белән дә бизәлгән булса, ел хуҗасы күңеленә һичшиксез хуш киләчәк. Тагын бер сер: табында кабак үзе яки аннан әзерләнгән ризыклар да Атның сезгә мөнәсәбәтен “йомшартачак”. Ә ит ризыклары арасында беренче чиратта йорт куяныннан әзерләнгәне торырга тиеш.
Яңа елда эчемлек сайлауга да аерым игътибар кирәк. Ат өчен иң яхшысы сыйфатлы шәраб сайлау. Ә бәйрәм тортында Яңа ел атрибутлары – Кыш бабай, Кар кызы, курантлар, чыршы булса, әйбәт. Атка татлы ризыклар бик ошый.
Иң мөһиме барлык тәм-томнар да кайнар, кем әйтмешли, “мичтән алынып” табынга бирелергә тиешләр. Өстенә спиртлы эчемлекләр сибелгән “утлылары” да хуплана. Ат сезнең тырышлыкны күрми калмаячак.
Тагын бер киңәш бәйрәм өстәлегез яшел, сары, кара төсләрдән балкып торсын. Әгәр аны тере чәчәкләр, матур кувшиннарга салынган эчемлекләр бизәсә, уртада кабаклы ризык торса, бик әйбәт булачак!
Берничә рецепт:
“Кыш бабай бияләе” салаты
6-7 порциягә пешерелгән бер тел, ярты баш суган, 4 пешкән бәрәңге, 2 пешкән кишер, 3 тозлы кыяр, 1 әче-татлы алма, 5 йомырка, 1 банка консервланган борчак, ярты гранат, 5-6 тармак укроп, тоз, төелгән борыч, майонез кирәк.
1 кишерне вак угычта уабыз, 2 йомырканың агын сарысыннан аерып, вак угычтан уабыз. Телне, бәрәңгене, калган кишерне, кыярны, алманы, йомыркаларны һәм калган сарыларын шакмаклап турыйбыз, укроп һәм суганны вак итеп турыйбыз. Барлык компонентларны бергә кушып, борыч, тоз һәм майонез салып болгатабыз. Массаны бияләй рәвешенә кертәбез, өстенә уылган кишер, “бияләй”нең кул тыга торган урынына уылган йомырка агы сибәбез һәм гранат төшләре белән бизибез.
“Кечкенә атлар” печеньесы
20 данә өчен 200 грамм атланмай, ярты стакан шикәр комы, 2 аш кашыгы бал, 2 йомырка сарысы, он, ярты бал кашыгы күперткеч, глазурь өчен 2 йомырка агы, ярты бал кашыгы лимон согы, стакан ярым шикәр пудрасы, төрле төстәге азык буягычлар кирәк.
Атланмайны шикәр комы белән уабыз, бал, йомырка сарысы өстәп болгатабыз. Аннары он салып йомшак камыр басабыз. Аны пакетка салып 40 минутка суыткычка куябыз. Әлеге вакыт узгач камырны 5-7 миллиметр калынлыкта җәябез, ат фигуралары ясап кисәбез һәм алсу төскә кергәнчә пешерәбез. Глазурь өчен йомырка агына лимон согы һәм болгата-болгата өлешләп шикәр пудрасы кушабыз. Масса болгаткычтан акмый башлаганчы болгатабыз. Глазурьны дүрт өлешкә бүләбез һәм һәркайсына азык буягычы кушабыз һәм буйыйбыз.

Оценить материал и/или оставить мнение

БАРЛЫК ЯҢАЛЫКЛАРНЫ УКУ