Буада «Чиста су» программасы кайсы авылларны сулы итәчәк?

Район башкарма комитеты җитәкчесенең газлаштыру буенча урынбасары Вәгыйзь Гомәров сүзләренә караганда, быел райондагы берничә авыл халкы сулы булачак. Бүгенге көндә Ташкичүдә (Тимбай авыл җирлеге) 3 су скважинасы һәм 2 башня куелган. Ә су кертү буенча әлегә проект кына әзерләнгән. Тиздән биредә төп эшләр башланып китәчәк. Беррәттән Иске Суыксуда да 21 километр аралыкта су кертелә. Ә Килдуразда 3 ел буена алып барылган эшләр быел төгәлләнергә тиеш. Анда хәзер су башнясы урнаштырыла, ә моңа кадәр скважиналар куелган. Быел Ивашевка авылының бер урамында 2,5 километр аралыкта су торбалары сузу планлаштырылган. Анысына акчаны федераль бюджет биргән. Калганнарын республиканыкы финанслаган.