Буаның Нәүрүз гүзәле кем?
Аны кичә район мәдәният йортында Нурия Гайнуллова оештыруында үткәрелгән “Нәүрүз гүзәле” конкурсында ачыкладылар.
Бу исемне сигез кыз – лицей-интернаттан Нәфисә Сәфәрова, 5 номерлы мәктәптән Лилия Сәлиева, 2 номерлы лицейдан Илзирә Шәкүрова, Казан социаль юридик институты студенты Айгөл Галимова, Р. З. Сәгъдиев исемендәге мәктәп укучысы Назгөл Баһаветдинова, М. Вахитов исемендәге гимназиядән Камилә Мусина, 1 номерлы мәктәптән Адилә Хәмидуллина, Килдураздан Лилия Әхмәтова дәгъваладылар.
Төрле конкурсларда үзләренең осталыкларын, уңганлыкларын, белемле булуларын күрсәттеләр. Шул ук вакытта татар кызларына хас булганча тыйнак булып кала белделәр. Коллегабыз - “Байрак” газетасы редакторы, Бөтендөнья татар конгрессының Буа җирле бүлекчәсе җитәкчесе Гакыйл Камалетдинов җитәкчелегендәге жюри өстенлекне бертавыштан Нәфисәгә бирде. Калганнары барысы да төрле номинацияләрдә җиңү яуладылар.
Булдырдыгыз, кызлар!