Буалы яшь техниклар Россиядә беренче унлыкта
Мондый уңышка мәктәптән тыш эшләр үзәгенең Роман Соловьев җитәкчелегендәге “Робототехника” түгәрәгендә шөгыльләнүче 5 номерлы мәктәп укучылары иреште.
Аларның Мәскәүгә “Робофест-2016” VIII Бөтенроссия фестиваленә барачакларын хәбәр иткән идек инде. 9 “А” сыйныф укучылары Нияз Маннаповтан һәм Илназ Әхмәдуллиннан, 5 “Б” сыйныфтан Радик Бихуҗиннан, Владимир Журавлевтан һәм Булат Низамовтан торган “West” командасы “ИкаР – Россиянең инженер кадрлары” бәгесендә җиденче, “Hello, Robot! Траектория – Квест” ярышында сигезенче урын алды. Фестивальдә 1 меңнән күбрәк команда һәм 3 мең робот техникасын сөюче катнашкан.
Татарстанны исә Казаннан һәм Яр Чаллыдан тагын ике команда тәкъдим иткән.
Буалы яшь техникларны тәбриклибез, киләчәктә тагын да зур җиңүләр телибез!