ЯҢАЛЫКЛАР

Ноябрь башында Канаш шәһәрендә Канаш шәһәренең бокс буенча беренче тренеры, СССРның спорт мастеры П.Г. Зиньков истәлегенә бокс буенча 14 нче ачык республика турниры булды.

Анда 120 катнашучы түбәндәге шшәһәрләрне тәкъдим итте: Чабаксар, Яңа Чабаксар, Канаш, Шумерля, Чуашстан, Йошкар-Ола, Марий Эл республикасының Волжск, Татарстанның Апас шәһәр тибындагы поселогы, Мордовия, Ульяновск.

Алар арасында Буадан ике боксчы, тренер Рөстәм Җамалиев шәкертләре – Р.З. Сәгъдиев исемендәге мәктәп укучысы Иван Захаров һәм Иске Суыксу мәктәбеннән Раил Хәйбуллов. 28 килограммга кадәр авырлык категориясендә Иван Захаров - икенче, 43 килограммга кадәр авырлыкта Раил Хәйбуллов өченче урынны алды. Шунысын да билгеләп үтәргә кирәк, Иван мондый зур ярышларда беренче тапкыр катнашты.

Бүген Татарстан Республикасы Авыл хуҗалыгы һәм азык-төлек министрлыгында 2019 елның 10 аенда терлекчелек тармагына йомгак ясадылар. Киңәшмәне Татарстан Республикасы Авыл хуҗалыгы һәм азык-төлек министры урынбасары Ленар Гарипов үткәрде.

 Чарада муниципаль районнарда терлекчелек буенча консультантлар, авыл хуҗалыгы һәм азык-төлек идарәләренең селекция-нәсел хезмәтләре башлыклары һәм башка җаваплы затлар катнашты

Бүген Буага республика ЮХИДИ идарәсенең аерым йөкләмәләр буенча инспекторы Рафаэль Сәгъдиев килде.
"Җәяүлеләр юлы" профилактик акциясе кысаларында ул Буа шәһәренең Р.З. Сәгъдиев исемендәге мәктәптә «Юл куркынычсызлыгы почмагы»н ачты. Анда укучылар өчен юлны ничек дөрес итеп күчәргә өйрәтү буенча әсбаплар, яктылык кайтаручы элементлар урнаштырылды. Казан инспекторы укучыларга да шундый бүләкләр тапшырды. Чара район ЮХИДИ бүлекчәсе һәм «Юл хәрәкәте иминлеге» учреждениесе хезмәткәрләре катнашында үтте.

Бүген  Татарстан  Республикасы Авыл хуҗалыгы  һәм азык-төлек  министрлыгында  «Агростартап» гранты ярдәме конкурсында    катнашучыларга  сертификатлар  тапшырылды.   Грантларның  гомуми  суммасы    313 млн. сум  тәшкил  итә.   Татарстанның 36 муниципаль   районыннан  конкурста  катнашуга  теләк  белдергән   132 крестьян (фермер) хуҗалыгыннан    103 КФХ 2 млн сумнан  4  млн  сумга  кадәр  күләмдә  грантлар  алдылар.   Иң күп җиңүчеләр  Мамадыш  районыннан булды    (8 фермер), Азнакай  һәм Тәтеш  районнарыннан    (6 шар фермер), Кукмара,  Саба  һәм   Нурлат районнарыннан  5әр фермер  җиңүче  булды.   

Полиция көне алдыннан район эчке эшләр бүлеге начальнигы Ренат Хәсәнов, хезмәт вазыйфаларын башкарганда һәлак булучы коллегаларның якыннарын чәй табыны артына җыйды. Ул алардан хәл-әхвәлләре турында сорашты, ярдәм кирәкмиме, дип кызыксынды. Барысы да Ренат Фиргать улына игътибар, ярдәм, хәтер өчен рәхмәт белдерделәр. Соңыннан полиция начальнигы, район җитәкчелеге исеменнән, хезмәт бурычын үтәгәндә һәлак булган полиция хезмәткәрләре гаиләләренә матди ярдәм тапшырды.

Сорауларга дәүләт алкоголь инспекциясенең  территориаль органы әйдәп баручы белгеч-эксперты Рөстәм Хәбибуллин җавап бирә.

“Шәһәрдәге сәүдә нокталарының берсендә бер тапкыр кулланылучы тартмада  салат сатып алдым. Тартмада бернинди мәгълүмат ябыштырылмаган. Сатучыдан кайчан ясалган дип кызыксынгач, ул яңа гына китерделәр, дип җавап бирде. Өйгә кайткач кабып карасам,  салат бозылган. Мәгълүмат ябыштырмыйча җитештерүче закон боза түгелме?

Гүзәл Нәгыймуллина.

Буа шәһәре”.

-Җитештерүче (башкаручы, сатучы) бу очракта  “Кулланучылар хокукларын яклау турында”гы федераль законның 10 маддәсен боза

Күптән түгел Рус Киштәгендә авыл яшьләре җыелып, часовняга ремонт ясадылар. Алар белән бергә җиң сызганып 79 яшьлек Михаил Гришин да эшләде. Ул кайчандыр үзе ясаган иконаларны яңартты.

Бу юлы да аның гомер буе кызган тимер кыйнап тупасланып беткән куллары, ювелирга хас нечкәлек белән эшләделәр – ул изге сурәтләрнең һәр контурын төгәл сызып, оригинал макетка туры китереп башкарды. Соңгы елларда буяу, пумала хакында онытып торуына да карамастан.

Ел саен Полиция көне алдыннан бүлекнең йә алдынгы подразделениесе эшчәнлеге, йә тырыш хезмәткәрләре хакында язабыз. Быелгы язмабыз герое итеп  ун ай эчендә унике җинаять эше ачкан авыл “участковые” Равил Ларинны күрсәттеләр.

Иске Тинчәле авылында мәдәният өлкәсендә хезмәт куйган Сәгадәт Юнысованы һәм Тәуфыйкъ Сафиуллинны искә алу кичәсе узды. Әлеге чара мәдәният ветераннарының ТАССРның 100 еллыгына багышланган “Истә, һаман да истә” дигән очрашуының тагын берсе булды.

Кичә авыл мулласы Равил Нәҗмет-диновның коръән укуы белән башланды.  Гөләндәм  Хәмитова, Кәүсәрия Әхмәтова, Гөлчәчәк Кәлимуллина, Равил Җәгъфәров, Илдар Нуруллин, Фәһимә Җәләлова, Тәнзилә Абикеева коллегаларының залга җыелган авылдашлары, якыннары алдында иң җылы хатирәләрне яңарттылар.

Республикада шикәр чөгендере уңышы узган ел күрсәткеченнән 31,7% артыграк. Татарстан Республикасы Авыл хуҗалыгы һәм азык-төлек министрлыгы мәгълүматлары буенча, 7 ноябрьгә республикада шикәр чөгендере 63,2 мең гектардан җыеп алынган, ягъни бу культура мәйданнарының 99%. 2 млн 774,4 мең тонна татлы тамыр җыелган, узган елның шушы чорына 2 млн 131,7 мең тонна булган.

«Республика буенча шикәр чөгендеренең уртача уңышы 438,9 ц/га тәшкил итә, бу узган ел күрсәткеченнән 105,8 ц/га яисә 31,7% ка артыграк», – дип хәбәр итте Татарстан Республикасы Авыл хуҗалыгы һәм азык-төлек министрлыгының игенчелек тармакларын үстерү бүлеге башлыгы урынбасары Фәргать Зиннәтов.

Агентлыкның әңгәмәдәше сүзләренә караганда, әлеге культураның иң зур уңышы Тәтеш районында-532 ц/га, бу күрсәткеч буенча икенче урында Зәй районы-516 ц/га, өченче урында Минзәлә районы-506 ц/га.

«Зәй районында шикәр чөгендере иң күп җыелган – 481,8 мең тонна. Шулай ук Буа һәм Сарман районнарында шикәр чөгендере җитештерү буенча лидерлар рәтендә, аларның күрсәткечләре – 359,8 мең тонна һәм 355,9 мең тонна», – дип билгеләп үтте Фәргать Зиннәтов.

Россия Федерациясе Авыл хуҗалыгы министрлыгы мәгълүматларына караганда, 6 ноябрьгә ил буенча тулаем алганда, 1,07 млн.га мәйданнан шикәр чөгендере казып алынган, ягъни мәйданның 93,1% (2018 елда – 1,05 млн. га). Шул ук вакытта 49,5 млн. тонна (2018 елда – 38,7 млн. тонна) җыелган, уңдырышлылык-464,7 ц/га (2018 елда-369,4 ц/га).