ЯҢАЛЫКЛАР

Әлки авылында Җиңү көненә багышланган чара узды. Бәйрәмдә Буа муниципаль районы башлыгы Марат Җәббаров та булды. Ул авылның 90 яшьлек юбилярларны котлады. Аларга сугыш елларында фидакарь хезмәтләре өчен рәхмәт белдерде, нык сәламәтлек һәм иминлек теләде. Шулай ук бәйрәмне оештыручы Раил Зыятдинов та авылдашларын котлады. Чара бәйрәм концерты һәм чәй өстәле артында тәмамланды.

1 Май-Хезмәт ияләренең халыкара бердәмлеге көне. Буалыларны бәйрәм белән Буа муниципаль районы башлыгы Марат Җәббаров котлады

Адав-Толымбай авылында гомер итүче Фирүзә әби Әхмәтшинага 80 яшь тула. Ул еш кына тальянканы кулына ала. Соңгы көннәрдә ешрак моңсу көйләр уйный – сугыш кырында ятып калган әтисен Шәрифне искә ала. Гармун да-аның истәлеге.

“Татарстан Республика-сының сортсемовощ” җәмгыяте генераль директоры, Татарстанның атказанган авыл хуҗалыгы хезмәткәре, авыл хуҗалыгы фәннәре кандидаты Харис Камалиев җирдә хезмәт иң беренче чиратта шатлык бирергә һәм мул да,  тәмле дә уңыш китерергә тиеш, дигән фикердә. Иске Суыксу мәктәбе бакчасында уку йортлары җитәкчеләре, мәктәпләр яны участоклары хуҗалары белән  очрашкан тәҗрибәле белгеч нәкъ шул серләргә өйрәтте дә.

Татарстан Республикасы буенча Росреестр идарәсе гариза бирүчеләрне якынлашып килүче бәйрәм көннәре белән котлый: 1 Май - Яз һәм Хезмәт бәйрәме, 9 Май - Җиңү көне - һәм күп функцияле үзәк офисларында бәйрәм алды һәм бәйрәм көннәрендә документлар кабул итү һәм бирү графигы турында хәбәр итә. 

2019 елның 30 апрелендә «Минем документлар» офисларында эш көне 1 сәгатькә кыскартылган. 
Казанның Зареченский, Мәскәү, Яңа Савин, Дәрвишләр, Совет һәм Көньяк бүлекләре 8:00 дән 17:00 гә кадәр, ә Идел буе бүлеге 8:00 дән 19:00 гә кадәр эшләячәк.

Татарстан Республикасы буенча Росреестр идарәсе Youtube каналында «Ветераннар икеайлыгы»социаль акциясе турында видеоролик урнаштырды.  Әлеге социаль акция 22 апрельдә старт алды һәм 2019 елның 22 июнендә төгәлләнәчәк.

Исегезгә төшерәбез, "Ветераннар икеайлыгы" кысаларында дәүләт кадастр исәбе һәм ветераннарның күчемсез милек объектларына хокукын дәүләт теркәве өч көн эчендә бара!

Кичә, 29 апрельдә, «Бердәм РОССИЯ» Бөтенроссия сәяси партиясенең Буа төбәк бүлеге башкарма секретаре Наталья Храмова «Кояшкай» балалар бакчасының волонтерлар белән берлектә «Өлкән буын» федераль партия проектын һәм "Безнең кадерле ветеран" җирле партия проектын гамәлгә ашыру кысаларында Буа муниципаль районының Яңавыл авылында яшәүче Бөек Ватан сугышы ветераны Низамов Әнвәр Борһан улы янында кунакта булдылар.

Бөек Ватан сугышында җиңүнең 74 еллыгы кысаларында Иске Суыксу мәдәният йортында Җиңү бәйрәме уңаеннан буыннар очрашуы булды. Чарада Буа муниципаль районындагы халыкка социаль ярдәм күрсәтү үзәгендә карамакта торган тыл хезмәткәрләре, сугыш елы балалары, Иске Суыксу мәктәбе укучылары, социаль хезмәткәрләр, Мәдәният йорты белгечләре катнашты.

Чараның максаты булып бәйрәм традицияләрен югалтмау, Бөек Ватан сугышында һәлак булучыларны искә алу торды.

Очрашу кунаклары өчен җиңү бәйрәме белән котлау әзерләнде, китаплар күргәзмәсе, Бөек җиңүдә һәлак булучылар өчен куелган һәйкәл янына сәяхәт оештырылды.Чара чәй табыны янында тәмамланды.

Ел да апрель ае җитте исә бар җиһан Тукай рухына, Тукай аһәңнәренә күмелә. Быел да бу шулай. Бу фани дөньяда нибары 27 ел гына яшәп калган Тукаебыз быел үзенең 133 нче язын йөз меңнәрчә милләттәшләре, фикердәшләре янәшәсендә каршылый. Бу көннәрдә кайсы гына төбәккә, мәктәпкә, балалар бакчасына, мәдәният йортына барып чыкма, сөекле Тукаебызның тормыш юлына һәм иҗатына багышланган һәртөрле кичә, тантаналы чараның шаһиты буласың. ”Теремкәй” балалар бакчасында да атна буе Тукай рухы хөкем сөрде. Сөекле шагыйребезгә багышланган атналыкта  татар теле тәрбиячесе Лилия Җәмәлдинова балаларны шагыйрьнең үзенчәлекле тормыш юлы белән таныштыра килде. Балалар тарафыннан яратылып укыла торган  Г.Тукайның әкиятләре буенча оештырылган рәсем, кул эшләре күргәзмәләре, кичке укулар, эшчәнлекләр балаларны сихри дөньяга алып керде. Тәрбиячеләр тарафыннан сәхнәләштерелгән “Су анасы” әкияте бәйрәмгә ямь өстәде. Бәйрәмнең “Теремкәй” балалар бакчасына караган Әхмәт, Кайбыч, Яңа Чәчкаб  балалар бакчасы  балалары белән бергәлектә узуы да аеруча әһәмиятле.

Бөек Җиңүнең 74 еллыгын бәйрәм итү алдыннан, Буа шәһәренең «Теремок» балалар бакчасының өлкән һәм әзерлек төркемендә тәрбияләнүчеләр ял үзәгендә булдылар, анда «Солдат» дигән нәфис фильм карадылар. Балалар өчен экскурсия балаларда Бөек Ватан сугышы турында белемнәр формалаштыру, мәктәпкәчә яшьтәге балаларның үз илебез тарихы турында белемнәрен баету, халкыбызның каһарманлыгы өчен горурлык хисе тәрбияләү, армия белән тотрыклы кызыксыну тәрбияләү максатыннан оештырылды. Фильмны сайлау очраклы түгел, иң кечкенә солдатның – Бөек Ватан сугышы герое, алты яшьлек Сережа Алешковның реаль тарихы картинаның нигезендә. Ул сугыш турында булуына карамастан, фильмнан игелеклелек балкый.