ЯҢАЛЫКЛАР

Әле урамда кояшлы җылы көннәр хөкем сөрсә дә, малларны җәйләүдән торакларга кайтарыр вакыт җитте. Белгечләр кышлатуга күчерүне сентябрь уртасыннан соңга калдырмаска киңәш итә.

– Көз барыбер үзенекен итә – көндезләрен һава температурасы ничек кенә югары булмасын төнгә суыта. Сыерлар өчен бу файдага түгел, – ди авыл хуҗалыгы һәм азык-төлек идарәсе начальнигы Ранис Габитов. Аның әйтүенчә, район хуҗалыкларында малларны кышлатуга күчерү төгәлләнү алдында. “Яхшы торак – ярты азык” дигән әйтемне истә тотучылар кышлатуга терлекләрне җәйләүгә күчерү белән әзерләнә, фермаларны төзекләндерә башлый. Күбесендә ремонт төгәлләнгән. Бары “Йолдыз” җәмгыятендә генә берничә көнлек эш бар. Анда 200 башка исәпләнгән бинада идәннәрне, 100 башка исәпләнгәнендә түбәне алмаштыралар. 

“Заря” агрофирмасының “Родина” бүлекчәсендә сыерларны фермага беренчеләрдән булып, сентябрь башында ук кайтардылар.

Сентябрь башыннан  гриппка каршы вакциналаштыру башланды. Быел ул районда 22 меңнән күбрәк кешене колачлаячак, дип көтелә.  Гриппка каршы кампания нинди тәртиптә узачак, прививканы кайларда ясатырга булла? Материал шул хакта.  

Район үзәк дәваханәсе баш эпидемиологы Резеда Җәләлова сүзләренә караганда, быел гриппка каршы 17 меңгә якын өлкән кешене һәм 6 меңнән күбрәк баланы вакциналаштырырга җыеналар. Узган ел районда 45 процент яшәүче вакциналаштырылса, быел бу санны 55 процентка җиткерергә кирәк. Табиб әйтүенчә, безнең районга быел да 2013-2014 еллардан бирле таныш “Совигрипп” препараты кайтарылган.  Гади итеп аңлатканда, ул көчле “Мичиган” вирусына дә каршы торырга сәләтле. Вакциналарның составы ел саен үзгәртелеп, яңа төре чыгарыла. 2019-2020 елгы вакцина h1n1 штаммнары белән эшләнә. Ә аның тәэсир итү сәләте түбәндәгечә: организмга кертелгән вакцина, грипп вирусы эләксә, ул аның мембраналарын параличлый һәм үтерә. Моның белән вирусның алга табан үсешен туктата.

Агымдагы елның алты аенда Татарстан Пенсия фонды пенсиягә чыгарга торган 22 мең гражданның ташламаларын, аларга тиешле социаль ярдәмне раслады. Әлеге мәгълүматлар ташламалар күрсәтүче власть органнарына һәм ведомстволарга җибәрелде.

Иң зур күләмдә раслаучы мәгълүматлар эш бирүчеләр-дән килде. Бу пенсия яшенә җитеп килүчеләрнең диспансерлаштыру үтүгә өстәмә ял көненә хокукы турында. ПФР эш бирүчеләр соравы буенча 16 мең кешегә карата мәгълүмат бирде. Хәзерге вакытта республикада 46 меңнән күбрәк, Буа районы буенча 432 эш бирүче белән килешү төзелгән.

Шулай ук пенсияалды яшендәгеләрне һөнәри кабат укыту буенча да эш алып барыла. Бүгенге көнгә Буа районы буенча шундый 58 кеше укып чыкты. Республика буенча 4,5 мең кеше пенсиягә чыгу алды яшендә булучыларны һөнәри кабат укыту, квалификацияләрен күтәрү, уку чорына үстерелгән пособие түләү яисә әлеге категория гражданнарга эш эзләү буенча программаларны гамәлгә ашыручы шөгыль үзәкләре соравы буенча статусын расладылар.

Әгәр пенсияалды яшендәге кеше ташламаларга хокукын раслаучы мәгълүматларны мөстәкыйль алмакчы икән, ул моны ПФР сайтындагы шәхси кабинеты аша яисә клиент хезмәтчелегендә башкара ала. Шул рәвешле, Татарстан буенча ел башыннан бирле 920 кеше, күпфункцияле үзәк аша 460 кеше белешмәләр алды.

Узган ел, туфракта дым җитмәү сәбәпле, уҗымнар начар тишелде, язын хуҗалыкларда барлык мәйданны диярлек кабат чәчәргә туры килде. Быел, шөкер, һава торышы алай сынамады –  киләсе ел уңышына нигез салганга кадәр яңгырлар мул булды. Көзге чәчүне оптималь срокларда үткәргән хуҗалыклар кырларында инде уҗымнар ямь-яшел булып утыра.

Авыл хуҗалыгы һәм азык-төлек идарәсе начальнигы Ранис Габитов әйтүенчә, хуҗалыклар нигездә тиешле срокка сыешкан – 20 августтан 10 сентябрьгә кадәр планлаштырылган 18 мең гектарның 15 меңгә якыны чәчелгән. Бары кайбер фермер хуҗалыклары гына соңарган. Хәзер алар узган елгы уңышсызлыкка юлыкмас өчен яңгыр яуганны көтәләр. Дым, вакытында чәчелеп, тишелеп чыккан, кайбер кырларда тармаклану фазасында булган үсентеләргә дә кирәк. Соңгы көннәрдәге җәй айларындагы кебек кояшлы, җылы  һава торышы дым югалу белән бергә корткычларның үр-чүенә дә китергән. “Рос-сельхозүзәк”нең районара бүлеге җитәкчесе Радик Ибәтуллин, әйдәп баручы агрономы Анна Алексеева хуҗалыклар җитәкчеләре чакыруы буенча уҗым-нарны бу уңайдан һәм башка күрсәткечләр буенча тикшерәләр.

Бүген «Тамак» кафесында Россия Эчке эшләр Министрлыгының Миграция мәсьәләләре буенча подразделениеләр оешуына 300 ел тулуга багышланган чара узды.

Җыелучыларны Буа районы башкарма комитеты җитәкчесе Ранис Камартдинов котлады.

"Экстремизмга-ЮК! " айлыгы кысаларында Буа муниципаль районының «Гармония» халыкка социаль хезмәт күрсәтү үзәгенең гаилә һәм балаларга социаль ярдәм күрсәтү бүлеге белгечләре «Преодоление» клубы әгъзалары өчен «Толерантлык - тынычлыкка юл» дигән чара уздырганнар.

"Әкият" балалар бакчасының мәктәпкә әзерлек төркеме балалары «Көзге игелек атнасы - игелекле эшләр эстафетасы» #ДОБРЫЙТАТАРСТАН #МӘРХӘМӘТЛЕТАТАРСТАН " акциясендә катнаштылар. Балалар үз хезмәтләре белән үстерелгән кәбестә, болгар борычы, помидор, кыяр һәм алма  "авыл ишегалды" ннан мул уңыш җыеп алдылар һәм Нина Степановнага мәхәббәт һәм рәхмәт сүзләре белән уңышның бер өлешен бүләк иттеләр. Аңа сәламәтлек һәм озын гомер теләделәр.

Татарстанда дәүләт кадастр исәбенә куюның уртача вакыты соңгы өч елда уннан алты көнгә кадәр кимегән.  Бу электрон сервисларны гамәлгә кертү һәм ведомствоара хезмәттәшлекнең төрле формаларын үстерү аркасында мөмкин булды.

Дәүләт кадастр исәбенә күчемсез милекне кую вакытын сизелерлек киметергә кадастр исәбенә алу һәм хокукны теркәү өлкәсендә дәүләт хезмәтләрен алуны гадиләштерүгә юнәлдерелгән Электрон сервислар мөмкинлек бирә. Шулай итеп, гариза Росреестр порталы аша бирелә икән, кадастр исәбенә куелу биш эш көне дәвамында башкарыла. Әгәр дә гариза КФҮ аша бирелә икән, бу очракта процедура җиде эш көне дәвамында уздырылачак.

Бүген Иске Суыксу авыл җирлеге Советының чираттагы утырышында авыл җирлеге башлыгы итеп Юсупова Венера Шәүкәт кызы сайланды. Депутатлар аңа ышаныч белдерделәр, аның кандидатурасын муниципаль берәмлек җитәкчесе вазифасына бертавыштан хуплады.

Бүген Адав-Толымбай авыл җирлеге Советы утырышы булды, анда кадрлар мәсьәләсе каралды. Депутатлар бертавыштан яңа сайланган җирлек Советы депутаты Әхмәтҗанов Азат Фазылҗан улын авыл җирлеге башлыгы итеп сайладылар.