ЯҢАЛЫКЛАР

Кичә, 27 август көнне, Буа муниципаль районының картлар һәм инвалидлар өчен интернат-йортында, бәйрәм чараларын үткәрү вакытында куркынычсызлыкны тәэмин итү максатыннан, учреңдениедә яшәүчеләрне эвакуацияләү буенча күнекмә узды. Шулай ук хезмәткәрләр һәм социаль хезмәт алучылар арасында Террорчылыкка каршы саклану, гадәттән тыш хәлләрне һәм янгын куркынычсызлыгын булдырмау буенча инструктажлар үткәрелде.

Бик-Үтидән фермерлар Миләүшә һәм Җәмил Дәүләтшиннар инде икенче ел рәттән җәйнең генә түгел, көзнең дә тәме җиләктә булуын раслап киләләр. Былтыр сентябрьдә кура җиләге белән шаккатырганнар иде. Быел кураларга бакча җиләге дә өстәлде.

Гадәти җиләкне дә туйганчы ашап булмаган быелгы елда инде көз җиткәндә эре, телеңне йотарлык тәмле җимешләр белән сыйлану көтелмәгән бүләк кебек.

Ерак һәм кечкенә авылларда яшәүчеләргә табиблар үзләре килә. "Мобиль поликлиника» күчмә медицина комплексы инде атна дәвамында Буа районында эшли.

Килдураз авыл җирлеген чишмәләр ягы дип әйтсәң дә, ялгыш булмас. Мондагы авылларда ел саен чишмәләр төзекләндерелмичә калмый. Быел өчесен яңарттылар.

Биредә туып үскән, яшәгән халык та шундый – чишмә дисәләр, көчләрен дә, акчасын да кызганмыйлар, үзләре дә җиң сызганып эшкә тотыналар. Шундыйларның берсе – “Коммуна” җәмгыятенең элеккеге җитәкчесе мәрхүм Җәүдәт Хөсәеновның олы улы Айрат. Ул быел Мәскәүдән кайтып, авыл уртасындагы чишмәне төзекләндерде.

– Бәбки авылыннан Килдуразга кадәр торба сузып, әти китерткән чишмә суы бу. Берничә ел бу урында иске колонка гына торды. Авыл егетләре белән сөйләштек тә, яңартырга булдык. Тимердән ясалган беседка куйдырдык, колонка урнашкан урынга бетон аслык җәйдек.  Бу эштә Наил абый Галиев Һәм Динар Хөсәенов булышты. Авыл халкы бу матур урынга килеп, тәмле су алып китсен, – диде Айрат.

Ул икенче елны да бу изге эшен дәвам итәргә исәпли. Авыл башындагы чишмәне дә яңартачакмын, дип үз-үзенә сүз биргән.

Узган шимбәдә районда яңа объект – “Татавтодор” җәмгыятенең Буа филиалының заманча асфальт-бетон заводы ачылды. Ул “AMMAN UNIVERSAL-240” швейцария технологиясе буенча җиһазландырылган. Әлеге чит ил механизмы белән комплектлаштырылган заводның җитештерү күләме дә күбрәк, продукциянең сыйфаты да яхшырак. Бу хакта ачылу тантанасына килгән Та-тарстанның Транспорт һәм юл хуҗалы-гы министры Ленар Сафин да әйтте.

“Буа: диалог киңлекләре” халыкара фестивале тәмамланырга өлгермәде, Татарстаннан гына түгел, Россиянең төрле төбәкләреннән, хәтта  Әрмәнстаннан әйдәп баручы театр әһелләре икенче бер масштаблы һәм мөһим чарага җыелды. Узган атнада “Буа талиясе” өченче театраль лабораториясе узды.

Республика һәм Шәһәр көненә багышланган бәйрәм 30 августта шәһәрнең үзәк мәйданында, Үзәк паркта һәм Трусенев исемендәге стадионда узачак. Башлана 18 сәгатьтә.
Тантаналы өлеш башланганчы, 16 сәгатьтә, Орел өлкәсенең «Костер» берләшмәсе ветераннары һәм эзтабарлары катнашында, Ркия Мусинаның совет солдаты калдыкларын шәһәрнең Иске Татар зиратында җирләү тантанасы була. 17 сәгатьтә Туган якны өйрәнү музеенда күргәзмә залын ачу.

Бүген, 28 августта 18.00 сәгатьтә район мәдәният йортында Татарстан Халыклары дуслыгы йорты артистлары чыгыш ясаячак.  ТРның атказанган артисты Вадим Захаров, Зариф Зарипов "Гуллиз" таҗик бию коллективы солисты, Ләйсән Шакирова "Сантош" һинд бию ансамбле солисты, "Анадолу" Төркия автономиясе активисты Диләрә Дамар, Грузиянең "Вардзия"ансамбле солисты Бехруз Мавлонов.  Программаны алып баручы Анжелика Вәкилова. Артистлар тамашачыларга яңа музыкаль номерлар, дөнья халыкларының дәртле биюләре бүләк итәчәк, һәм, әлбәттә, яхшы кәеф бүләк итәчәк!

Ял итү үзәгендә Буа муниципаль районының "Гармония" халыкка социаль хезмәт күрсәтү үзәге хезмәткәрләренең янгын-техник минимумга өйрәнүләре узды. Укуларны Россия гадәттән тыш хәлләр министрлыгының ТР буенча Баш идарәсе УНД һәм Чүпрәле муниципаль районнары буенча МОНД инспекторы А.Р. Хәйруллин үткәрде.  Уку кысаларында хезмәткәрләр янгынны булдырмауга юнәлтелгән чаралар, янгын куркынычсызлыгы кагыйдәләре һәм инструкцияләре белән таныштылар, яну һәм янгын вакытында төп чараларны һәм саклану ысулларын өйрәнделәр. Моннан тыш, хезмәткәрләр янгын сүндерү чараларын куллану ысулларына җентекләп өйрәнде. Үзәкнең 67 хезмәткәре укуларда катнашты.

Республика халкыннан  сатып  алына  торган  сөткә бәяләр  мониторингы  Татарстан  Республикасы Авыл хуҗалыгы  һәм азык-төлек  министрлыгы    контролендә  тора.    

Август ае    рейтингы  йомгаклары  буенча  иң  яхшы  күрсәткечләр  Татарстанның Чистай    (20,71 сум), Буа  (20,38 сум), Алексеевск (20,30 сум) һәм Балтач  (20,29 сум) районнарында. Аларда  халыктан  сатып  алына  торган  сөткә  бәяләр  республика  буенча    уртача бәягә   (18,06 сум) караганда югарырак.  

Шулай  ук  түбәндәге  районнарда  да  республика  буенча  уртача  бәягә караганда  югарырак, болар:  Татарстанның  Әлки (19,75 сум), Спас  (19,39 сум), Нурлат  (19,20 сум), Яңа  Чишмә (19 сум), Кукмара (19 сум), Аксубай (19 сум), Биектау  (19 сум),  Питрәч  (18,98 сум), Мамадыш  (18,75 сум), Бөгелмә  (18,66 сум), Теләче (18,5 сум), Саба (18,46 сум), Чирмешән (18,4 сум), Тәтеш  (18,38 сум), Арча (18,37 сум), Азнакай (18,37 сум) һәм  Актаныш (18,2 сум) районнары.